Gender Gap in Aruba (Papiamento version)

“World Economic Forum” a introduci e “Global Gender Gap Index” na 2006 cu ta fungi como un cuadro pa capta e magnitut di diferencianan basa riba gender y pa capta nan progreso. Oficina Central di Estadistica tambe ta dirigi su atencion riba e topico internacional aki pa medio di data colecta for di e di cinco Censo di poblacion y vivienda cu a ser teni na October 2010. E termino “gender” ta referi na tanto hende muher como hende homber y con nan relata na otro. Pues igualdad di gender ta referi na e nivel di desaroyo social humano caminda derecho, responsabilidad, oportunidad di e ser humano no ta limita dor di nan sexo. E “Global Gender Gap Index” ta examina e gap entre hende homber y muher den diferente categoria fundamental: educacion, salud, sobrebibencia, participacion economico, oportunidad economico y poder politico.